सन्दर्भ तस्विर
काठमाण्डौं । काठमाण्डौं उपत्यकाबाट बाहिरिने लामो तथा छोटो दुरीका सवारी साधनले आजदेखि अनिवार्य यान्त्रिक परीक्षण गराउनु पर्ने भएको छ ।
दशैंको समयमा सम्भावित दुर्घटना रोक्ने उद्देश्यले सवारी साधनको यान्त्रिक परीक्षण अनिवार्य गरिएको हो ।
यस्तै सरकारले आजदेखि बीमा नगरेका यात्रूवाहक गाडी संचालनमा पनि रोक लगाएको छ । सरकारले बीमा नहुँदा सडक दुर्घटनाका घाइतेको उपचार र मृत्यु भएका व्यक्तिका परिवारलाई आर्थिक सहयोगमा समस्या देखिएको भन्दै यातायात व्यवसायीलाई निर्देशन दिएको हो । त्यसको कडाइकासाथ अनुगमनका गर्न यातायात व्यवस्था विभागलाई जिम्म दिइएको छ ।
यसैगरि लामो दुरीका सवारी साधनमा दुईजना चालक अनिवार्य राख्नुपर्ने, सवारी साधनमा सरोकारवालाको फोन नम्बर यात्रुले देख्ने गरी राख्नुपर्ने, टाइम कार्ड पालना गर्नुपर्ने र गाडीमा झुण्डिएर र छतमा बसेर यात्रा गर्न नपाइने व्यवस्था पनि मिलाइएको छ ।
दशै तिहार लगायत ठूला चाडपर्व नजिकिएसँगै सडक दुर्घटना र जनधनको क्षति हुन थालेको भन्दै सरकारले शुक्रबार सहसचिव फणीन्द्रमणि पोखरेलको संयोजकत्वमा सडक दुर्घटना रोकथाम तथा न्यूनिकरण एवं समस्या समाधानका लागि समन्वयन गर्न ७ सदस्यीय समिति गठन गरेको छ ।
