गोरखा । जिल्ला प्रशासन कार्यालय गोरखाले गएको आर्थिक बर्षमा मात्रै राहदानीबाट करिब ४ करोड रुपैयाँ राजश्व संकलन गर्न सफल भएको छ ।
कार्यालयले आब ०७८–०७९ मा राहदानीबाट मात्रै ३ करोड ६५ लाख ५८ हजार २५० राजश्व संकलन गर्न सफल भएको हो ।
कार्यालयले सोही अवधीमा कुल ३ करोड ७६ लाख ८८ हजार ३१४ रुपैयाँ राजश्व संकलन गरेको जनाएको छ । पछिल्लो समय युवाहरु अध्ययन तथा रोजगारीको लागि विदेश जाने क्रम बढे संगै प्रशासनमा राहदानी बनाउनेहरुको भिड नै लाग्ने गरेको छ ।
हातहतियार तथा संस्था दर्ता नविकरणका साथै बेरुजु, प्रशासनिक तथा न्यायिक दण्ड तथा जरिबाना शिर्षकमा कार्यालयले राजश्व संकलन गर्दै आएको छ ।
प्रशासनले दिने सेवा र सुविधाबाट मात्र ४ लाख ९९ हजार ११० रुपैयाँ राजश्व संकलन गरेको छ भने हातहतियारको नविकरण गर्दा १ लाख ६१ हजार ८५० रुपैयाँ राजश्व आम्दानी गर्न सफल भएको छ ।
कार्यालयले उपलब्ध गराएको रेकर्ड अनुसार प्रशासनिक दण्ड तथा जरिवाना शिर्षक अन्तरर्गत १ लाख ५२ हजार १०५, धरौटी शिर्षकमा २ लाख १७ हजार, न्यायिक दण्ड तथा जरिवाना तर्फ ६१ हजार ३९० रुपैयाँ राजश्व संकलन गरेको छ ।
कार्यालयले परिक्षा शुल्क बापत ३७ हजार ६०० संकलन गरेको छ भने वेरुजु शिर्षकमा १ हजार समेत राजश्व संकलन भएको जानकारी दिएको छ ।