काभ्रेपलाञ्चोक । बेथानचोक गाउँपालिका–४ चलाल गणेशस्थानमा पहिरो जादा ३ जनाको घटना स्थलमा नै मृत्यु भएको छ ।
प्राप्त विवरण अनुसार बिहीबार बिहान अबिरल बर्षा पछि निरबहादुर तामाङको घर माथीबाट आएको पहिरोले पुरिदा निरबहादुर, उनकी बहिनी ४० वर्षीया साबित्री तामाङ र आमा ६५ वर्षीया लादुलुङ तामाङको मृत्यु भएको हो ।
पहिरोले घर पुरिएको खबर प्राप्त गरेको जिल्ला प्रहरी कार्यालय काभ्रेपलाञ्चोक, ईलाका प्रहरी कार्यालय बनेपा, प्रहरी चौकी खोपासी, प्रहरी चौकी ढुङ्खर्क, नेपाली सेना र सशस्त्र प्रहरी बल नेपालबाट खटिएको संयुक्त टोलीले पहिरो पन्छाउदा निर बहादुर र साबित्रीको शव फेला परेको थियो ।
साथै पहिरोमा पुरिएर गम्भीर घाइते भएकी लादुलुङलाई उद्धार गरी शिर मेमोरियल अस्पताल बनेपा लगेकोमा उपचारको क्रममा उनको मृत्यु भएको हो ।
पहिरोले घर पूर्णरूपमा क्षति भएको छ । क्षतिको पूर्ण बिवरण भने आउन बाँकी रहेको जिल्ला प्रहरी कार्यालय काभ्रेपलाञ्चोकले जनाएको छ ।
