फाईल तस्विर
काठमाण्डौं । प्रतिनिधिसभा र प्रदेश सभा चुनावका लागि सीट बाँडफाँड गर्न सत्तारुढ गठबन्धन कार्यदलको बैठक आज पनि बालुवाटारमा बस्ने भएको छ ।
प्रधानमन्त्री निवास बालुवाटारमा मंगलबार बसेको बैठकले चुनावी तालमेल र सीट बाँडफाँडका विषयमा छलफल गरेको थियो । सीट संख्यामा लगभग सहमति भए पनि निर्वाचन क्षेत्रका विषयमा टुंगो लगाउन बाँकी रहेकोले आज बैठक गरेर सबै कुरा टुग्याउने कार्यदलका सचिव केशवराज जोशीले बताए ।
कार्यदलले प्रतिनिधिसभा र प्रदेश सभाका सीट संख्यासँगै निर्वाचन क्षेत्रबारे पनि छलफल गरिरहेको छ । कुन निर्वाचन क्षेत्रमा कुन दलको उम्मेदवार उठाउने भन्ने विषयमा छलफल भएको जनाइएको छ ।
२०७४ सालमा पाएको मत र स्थानीय चुनावको अवस्थालाई हेरेर कुन क्षेत्रमा कुन दल बलियो छ भन्ने एकीन गर्न लागिएको छ । त्यसकै आधारमा निर्वाचन क्षेत्र बाँडफाँड गरिँदै छ ।
आज सीट बाँडफाँड टुंगो लगाउने गरी कार्यदलको बैठक बोलाइएको सचिव जोशीले बताए । उनका अनुसार आज साँझ ५ः०० बजे प्रधानमन्त्री निवास बालुवाटारमा कार्यदलको बैठक बस्नेछ ।
