सन्दर्भ तस्बिर
पोखरा । पोखरा महानगरपालिका–३० को अर्घौ चोकस्थित रहेको एक बैंकको एटिएम मेशिन फोरेर नगद चोरी गर्ने ब्यक्तिलाई प्रहरीले पक्राउ गर्न सफल भएको छ । एनएमबी बैंकको एटिएम तोडफोड गरी २ वटा क्यासकेट र नगद चोरी गर्ने नवलपुर देवचुली नगरपालिका–५ घर भई पोखरा महानगरपालिका–३० डुँडाको मुख बस्ने भेडे भन्ने २१ वर्षीय अनिस तामाङलाई प्रहरीले पक्राउ गरेको हो ।
तामाङले पोखरा महानगरपालिका–२७ को तालचोकस्थित एनआइसी एसिया बैंकको एटिएम मेशिन तोडफोड गर्ने प्रयास गरेको तथा एनएमबी बैंकको एटिएम मेशिन फोडी साउन ३ गते बिहान नगद चोरी गरेका थिए ।
घटना पछि बेपत्ता भएका उनलाई गण्डकी प्रदेश प्रहरी कार्यालय पोखरा, नेपाल प्रहरी प्रदेश कार्यालय पोखरा, जिल्ला प्रहरी कार्यालय कास्की र ईलाका प्रहरी कार्यालय शिसुवाबाट खटिएको प्रहरीको टोलीले रुपन्देही जिल्लाको बेलहियाबाट पक्राउ गरेको कास्की प्रहरीले जनाएको छ ।
प्रहरीले घटनामा प्रयोग भएको ग. १० प २९६३ नम्बरको मोटरसाइकल समेत बरामद गरेको छ । उक्त घटनामा चोरी भएको क्यासकेट पोखरास्थित बिचारी चौतारामा फेला परेको थियो ।
तामाङलाई चोरी तथा डाँका सम्बन्धी कसूरमा जिल्ला अदालत कास्कीबाट ७ दिन म्याद थप गरी आवश्यक अनुसन्धानको प्रकृया सुरु गरेको पनि कास्की प्रहरीले जनाएको छ ।
