काठमाण्डौं : सरकारले प्रतिनिधिसभा र प्रदेशसभा निर्वाचन मंसिर ४ गते देशैभर एकै चरणमा गर्ने घोषणा गरेको छ ।
आज बसेको मन्त्रिपरिषद् बैठकले मंसिर पहिलो साता निर्वाचन गर्ने निर्णय गरेको हो । सत्तारूढ दल र निर्वाचन आयोगसँगको परामर्शमा सरकारले निर्वाचनको मिति घोषणा गरेको हो ।
निर्वाचन आयोगले सरकारलाई मङ्सिर २ गते निर्वाचन गर्न सिफारिस गरेको थियो । निर्वाचनको तयारी गर्न कम्तीमा १२० दिन वा ४ महिनाअघि मिति घोषणा गरिनुपर्ने निर्वाचन आयोगका पदाधिकारीले बताउँदै आएका थिए ।
तर आयोगलाई अब तयारीका लागि १०७ दिन मात्रै छ । २०७४ साल मंसिर १० र २१ गते दुई चरणमा प्रतिनिधिसभा र प्रदेशसभा निर्वाचन सम्पन्न भएको थियो ।
प्रतिनिधिसभा र प्रदेशसभाको ५ वर्षे कार्यकाल सकिन लागेकाले नयाँ निर्वाचन हुन लागेको हो । निर्वाचनवाट प्रतिनिधिसभाका २७५ सदस्य र प्रदेश सभाका ५५० सदस्य चयन हुनेछन् ।
प्रतिनिधिसभामा १६५ जना प्रत्यक्ष र ११० जना समानुपातिक प्रणालीबाट निर्वाचित हुन्छन् । प्रदेशसभाका लागि प्रत्यक्षतर्फ ३३० जना र समानुपातिकतर्फ २२० जना निर्वाचित हुनेछन् ।
