काभ्रे । काभ्रेको पनौतीमा बंगुरमा ‘अफ्रिकन स्वाइन फिभर’को सङ्क्रमण फेला परेको छ । पनौती नगरभित्र व्यावसायिक रुपमा पालिएको बङ्गुरमा सङ्क्रमण देखिएको नगरपालिका कार्यालयले जनाएको छ ।
बङ्गुरमा अफ्रिकन स्वाइन फिभर सङ्क्रमण पुष्टि भएपछि नगरपालिकाले बंगुर ओसारपसारमा रोक लगाएको छ । ओसारपसार गर्नुपरेमा बङ्गुरको स्वास्थ्य परीक्षण गरेर मात्रै ढुवानी गर्न आग्रह गरिएको छ ।
‘सम्भावित क्षेत्रमा थप परीक्षणको तयारी गरिरहेको नगरपालिकाले जनाएको छ । पशुसेवा विभागले अफ्रिकन स्वाइन फिभरलाई उच्च मृत्युदर भएको ‘अति खतरनाक’ महामारीजन्य रोग भनेको छ ।
सन् २०१८ मा छिमेकी देश भारत, चीन र भुटानमा देखिएको यो रोग नेपाल प्रवेश गरेको ५ महिनापछि काभ्रेपलाञ्चोकको पनौतीमा पनि देखिएको हो । चैतको पहिलो पटक काठमाण्डौको कागेश्वरी मनोहरा क्षेत्रमा पालिएका बङ्गुरमा उच्च मृत्युदर देखा थियो ।
अफ्रिकन स्वाइन फिभर रोगका कारण त्यसबेला काठमाण्डौ उपत्यकाका विभिन्न क्षेत्रमा झन्डै १ हजार बङ्गुर मरेका थिए ।
