एजेन्सी । प्रेम चक्करमा सफल हुन मान्छेले कतिसम्म गर्न सक्छन् ? प्रेमका लागि छोरीले आफ्नै जन्मदाता बुवाको हत्या गराउन सक्छ ? पत्याउन गाह्रो पर्छ तर भारतको झारखण्डस्थित सरायकेलामा यस्तै घटना भएको छ ।
भारतभर चर्चित बनेको व्यवसायी कन्हैया सिंहको हत्यामा उनकै छोरी अपर्णाको हात रहेको भारतीय प्रहरीले पुष्टी गरेको हो । बुवाको हत्या गराउन अपर्णाले हत्यारालाई हिराको औंठी दिएको समेत प्रहरी अनुसन्धानबाट खुल्न आएको छ ।
एसपी आनन्द प्रकाश र एसआईटी टीमका अध्यक्ष हरविन्दर सिंहका अनुसार बुवा कन्हैयाले आफुले चाहेको प्रेमी पाउन हत्या गरेको हो ।
कन्हैयाले अपर्णाका प्रेमी राजवीर सिंहको परिवारलाई दुःख दिने काम गरेका थिए । कन्हैयाका आतंकका कारण राजवीरको परिवारले आदित्यपुर भाग्नुपरेको थियो ।
कन्हैयाको हत्याको सूत्रधार उनकै छोरी रहेको र बुवा रहेको ठाउँ, छिनछिनको जानकारी हत्यारासम्म पुर्याउने काम छोरीले नै गरेको प्रहरीको दाबी छ ।
राजवीर र अपर्णाको प्रेम ५ वर्ष पुरानो हो । त्यतिबेला राजवीर १० र अपर्णा ८ कक्षामा पढ्थे । प्रेमबारे बुवा कन्हैयाले थाहा पाएपछि राजवीरसहित पूरै परिवारमाथि कुटपिट गरिएको थियो । त्यसपछि राजवीरको परिवारले गाउँ छाड्नुपरेको थियो ।
कन्हैयालाई मार्न हत्यारा निखिल गुप्तालाई राजवीरले ६ हजार रुपैयाँ र अपर्णाले हिराको औंठी दिएका थिए । अरु पैसा हत्यापछि दिने सहमति भएको जनाइएको छ ।