काठमाण्डौं । डलर साटिदिनु भन्दै डलरको आकारमा काटिएका कागजका टुक्राहरु राखेर दिई फरार भएका १ युवकलाई प्रहरीले राजधानीबाट नियन्त्रणमा लिन सफल भएको छ । काठमाण्डौं नागार्जुन नगरपालिका ९ स्युचाटार बस्ने ३३ वर्षीय कुमार श्रेष्ठले ८ लाख रुपैयाँ लिएर फरार भएका थिए ।
काठमाण्डौं महानगरपालिका १४ कलंकीस्थित सीता पेट्रोल पम्प नजिक ललितपुर महानगरपालिका १८ नख्खु बस्ने ६२ वर्षीय पुरुषलाई अपरिचित व्यक्तिले आफ्नो आमा गम्भीर बिरामी भई अस्पतालमा भर्ना भएको र उपचारको लागि पैसाको अत्यन्तै अभाव रहेकोले डलरका केही नोटहरु साटिदिन अनुरोध गरी उक्त नगद ठगी गरी फरार भएका थिए ।
पिडित ब्यक्तिले प्रहरीमा उजुरी दिए लगत्तै प्रहरी परिसर काठमाण्डौंबाट खटिएको प्रहरीले सुक्ष्म अनुसन्धान गरी ठगी गर्ने व्यक्ति कुमार श्रेष्ठ रहेको खुल्न आएपछि प्रहरी बृत्त कालीमाटीबाट खटिएको प्रहरीले काठमाण्डौं कलंकीबाट कुमारलाई पक्राउ गरेको हो ।
पक्राउ परेका कुमार उपर जिल्ला अदालत काठमाण्डौंबाट ७ दिनको म्याद थप गरी थप अनुसन्धान सुरु गरिएको प्रहरी बृत्त कालीमाटीले जनाएको छ ।