पर्सा । आफ्नै सालोको हत्या गरेको अभियोगमा भिनाजु सहित ५ जनालाई प्रहरीले पक्राउ गर्न सफल भएको छ । बहुदरमाई नगरपालिका २ सिसियाडी बैरियाटोल बस्ने ४० वर्षीय राजेश रामको हत्या संलग्न रहेको भन्दै उनका भिनाजु हिरामन महरा सहित प्रहरीले ५ जनालाई पक्राउ गरेको हो ।
पक्राउ पर्नेहरुमा जगरनाथपुर गाउँपालिका ६ बस्ने ४५ वर्षीय हिरामन महरा, ३६ वर्षीय रामबालक महरा, ४० वर्षीया बसन्ती देवी, ३५ वर्षीया सुनिता देवी र २२ वर्षीया रिंकु देवी रहेको पर्सा प्रहरीले जनाएको छ ।
शनिबार बिहान जगरनाथपुर गाउँपालिका ६ स्थित नारा खोलाको खोल्सामा राजेशको शव फेला परेको थियो ।
उनीहरुमध्ये हिरामन, बसन्ती, सुनिता र रिंकुलाई शनिबार तथा रामबालकलाई आइतबार प्रहरीले पक्राउ गरेको हो ।
जेठ २४ गते आफ्नै दिदीको घरमा आई बसेका राजेश रामलाई शनिबार राति मृतकको भिनाजु हिरामन महरा समेत परिवारका ५ जना सदस्य मिली घाँटी कसेर हत्या गरी खोल्सामा शव फालेको अनुसन्धानबाट खुल्न आएको पर्सा प्रहरीले जनाएको छ ।
पक्राउ परेको उपर ज्यान सम्बन्धी कसूरमा जिल्ला अदालत पर्साबाट ७ दिन म्याद लिई अनुसन्धान सुरु गरिएको छ ।
