काठमाण्डौं । लामो समयदेखि जम्मा भएर वितरण हुन नसकेको संगीत रोयल्टी यो वर्ष वितरण हुने भएको छ । संगीत रोयल्टी संकलन समाजले १ हजार ६३८ जनालाई यो वर्ष रोयल्टी वितरण गर्ने भएको हो ।
उल्लेखित संख्याका स्रष्टालाई २ करोड ७१ लाख २६ हजार रुपैयाँ रोयल्टी वितरण गर्न लागिएको समाजका अध्यक्ष सुरेश अधिकारीले जानकारी दिए ।
आगामी जेठ २५ गते एक कार्यक्रमको आयोजना गरी रोयल्टी वितरण गर्ने समाजको तयारी रहेको छ। यो रोयल्टी आर्थिक वर्ष २०७४र०७५ देखि २०७८÷०७९ सम्म संकलित रोयल्टी रहेको समाजका महासचिव बद्री पाण्डेले जानकारी दिए ।
यातायात, रेडियो, टेलिभिजन, सभाहल, मेला महोत्सव, कन्सर्ट र केही टीभी रियालिटी शोबाट उक्त रकम संकलन भएको समाजले जनाएको छ ।
डिजिटल तथ्यांक, सदस्यता भएको, योगदान दिएको र युट्युब र्याङकिङको आधारमा रोयल्टी वितरण हुने समाजका अध्यक्ष अधिकारीले बताए ।
यसपटक एक जना सर्जकले न्युनतम ५ हजार देखि अधिकतम २ लाखसम्म रोयल्टी पाउने भएका छन् ।
