शव संकलन गर्दै उद्दारकर्मी
जोमसोम । मुस्ताङको थासाङ गाउँपालिका २ सानसुरेमा भएको तारा एयरको जहाज दुर्घटनास्थलबाट अहिलेसम्म १३ जनाको शव संकलन भएको छ ।
दुर्घटनास्थलमा पुगेका सुरक्षाकर्मी र स्थानीयले बिहान १०ः३० बजेसम्म १३ जनाको शव संकलन गरेको जिल्ला प्रशासन कार्यालय मुस्ताङले पुष्टी गरेको हो । प्रशासकीय अधिकृत देवेन्द्रराज पाण्डेका अनुसार शव पहिचान गर्ने काम भइरहेको छ ।
हेलिकप्टरमार्फत पुगेका सेना, प्रहरी र शेर्पा तथा पैदलमार्गबाट गएका स्थानीयको टोलीले भेटिएका शव सङ्कलन र अन्यको खोजी जारी राखेका छन् । पैदलमार्गबाट गएका करिब १०० जना सुरक्षाकर्मीको टोली घटनास्थल नजिकै पुगेका छन् ।
समुन्द्री सतहदेखि ४ हजार मिटरभन्दा बढी उचाइमा रहेको घटनास्थलमा कुहिरो लागेकाले हेलिकप्टरमार्फत थप सुरक्षाकर्मी लैजान र सङ्कलित शव ल्याउन समस्या भएको प्रशासनले जानकारी दिएको छ ।
आइतबार बिहान पोखराबाट जोमसोमका लागि उडेको चालक दलका ३ जना सहित २२ जना सवार जहाज सोमबार बिहान दुर्घटनाग्रस्त अवस्थामा भेटिएको थियो ।
शव हेलिकप्टरबाट कोवाङ ल्याउने तयारी भईरहेको छ । अहिले नेपाली सेना, फिस्टेल र कैलाश एयरको १÷१ वटा हेलिकप्टर उद्धारमा परिचालन गरिएको छ ।
मौषम सफा हुनासाथै थप हेलिकप्टरबाट थप उद्धारकर्ता पठाउने र सङ्कलित शव ल्याउने तयारी भई रहेको प्रशासनले जनाएको छ ।
थासाङ गाउँपालिकाको केन्द्र कोवाङदेखि न्याउरीकोट पुग्न चार घण्टा दुरीमा रहेको मानापाथी हिमालको फेदीमा रहेको पहाडमा जहाज ठोक्किएर टुक्राटुक्रा परेको अवस्थामा आज बिहान भेटिएको हो ।
