एजेन्सी । पाकिस्तानका प्रधानमन्त्री इमरान खानले आफू पदच्युत हुनुअघि सेनाप्रमुख कमर जावेद बाजवालाई बर्खास्त गर्न खोजेको पाकिस्तानी सञ्चारमाध्यमहरूले खबर दिएका छन् ।
तर यस विषयमा रक्षा मन्त्रालयले सूचना जारी गर्न नमानेका कारण बाजवा पदमा नै छन् ।
बीबीसी उर्दूले यस घटनाक्रमको खबर अरूभन्दा अघि दिएको थियो । त्यसको समाचारमा बाजवाको नाम उल्लेख छैन तर खानले एक वरिष्ठ अधिकारीलाई हटाउन खोजेको उल्लेख छ । ती अधिकारी हेलिकप्टर चढेर राति प्रधानमन्त्री निवास पुगेको बताइएको छ ।
रोयटर्स समाचार संस्थाका अनुसार, बाजवा र आईएसआई प्रमुख लेफ्टिनेन्ट जनरल नदीम अन्जुमले खानसँग शनिवार अबेर रात भेटघाट गरेका थिए । त्यसको केही समयपछि खानलाई अविश्वास प्रस्तावमा बहुमतका साथ पदच्युत गरिएको थियो ।
आइतवार पाकिस्तानी सेनाले बीबीसी ऊर्दूको समाचार आधारहीन र गलत सूचना फैलाउने उद्देश्यले लेखिएको भन्दै खण्डन गरेको थियो ।
बीबीसी ऊर्दूका अनुसार, नबोलाइएका दुई पाहुना प्रधानमन्त्री निवास पुगेका थिए । निवासमा असाधारण सुरक्षा व्यवस्था कायम गरिएको थियो । शनिवार राति हेलिकप्टरमा पुगेका अतिथिहरूले प्रधानमन्त्रीसँग १५ मिनेट कुराकानी गरेका थिए ।
त्यसको एक घन्टाअघि खानले एक वरिष्ठ अधिकारीलाई बर्खास्त गर्न आदेश दिएका थिए । ती अधिकारी पनि उक्त बैठकमा उपस्थित थिए ।
तर ती वरिष्ठ अधिकारीलाई बर्खास्त गरी उनको स्थानमा अर्का अधिकारीलाई राख्ने आधिकारिक सूचना रक्षा मन्त्रालयले जारी गरेन । यसरी मन्त्रालयले प्रधानमन्त्रीको क्रान्तिकारी परिवर्तनलाई तुहायो, समाचारमा उल्लेख छ ।
