कञ्चनपुर । भिमदत्त नगरपालिका ११ गड्डाचौकी ब्यारेलबाट लागु औषध सहित २ जनालाई प्रहरीले नियन्त्रणमा लिएको छ । पक्राउ परेकाहरुबाट प्रहरील ७ ग्राम १६ मिलिग्राम अवैध लागूऔषध खैरो हेरोइन र ६० मिलिग्राम अवैध लागूऔषध चरेश नियन्त्रणमा लिएको हो ।
उक्त लागु औषध सहित प्रहरीले भिमदत्त नगरपालिका ५ तिनतारा बस्ने २६ वर्षीया माया लुहार र बेदकोट नगरपालिका ७ बस्ने पदम ओड फत्राउ गरेको जनाएको छ । बनबासाबाट नेपाल आउने क्रममा इलाका प्रहरी कार्यालय गड्डाचौकीबाट खटिएको प्रहरीले जाँच गर्दा उक्त लागूऔषध सहित फेला पारी उनीहरुलाई पक्राउ गरेको हो ।
उता रुपन्देहीको बुटवल उपमहानगरपालिका ११ मुस्कान पथ घर भएका २४ वर्षीय युद्वजित सुनारी र सोही उपमहानगरपालिका १३ बेलबास घर भएका २७ वर्षीय सुनिल श्रेष्ठलाई पनि ५ ग्राम ९६० मिलिग्राम अवैध लागूऔषध ब्राउनसुगर, ६ थान मोबाइल र १ थान तौल गर्ने मेसिन सहित प्रहरीले पक्राउ गरेको छ ।
सुनारीको घरमा लागूऔषध विक्री भइरहेको भन्ने खबर प्राप्त हुनासाथ वडा प्रहरी कार्यालय बुटवलबाट खटिएको प्रहरीले जाँच गर्ने क्रममा उक्त लागूऔषध सहित फेला पारी पक्राउ गरेको हो ।
त्यस्तै गरी, नवलपरासी (पश्चिम)को पाल्हिनन्दन गाउँपालिक (१ महेशपुर नजिकबाट करिब २ ग्राम अवैध लागूऔषध ब्राउनसुगर सहित भारत घर भएका ३४ वर्षीय मुकेश गुप्तालाई प्रहरीले पक्राउ गरेको छ ।
भारतबाट नेपालतर्फ पदैल आउँदै गरेका उनलाई जिल्ला प्रहरी कार्यालय नवलपरासी (पश्चिम) र सिमा प्रहरी चौकी महेशपुरबाट खटिएको प्रहरीले जाँच गर्ने क्रममा उक्त पदार्थ सहित फेला पारी पक्राउ गरेको हो ।
त्यस्तै दाङको घोराही उपमहानगरपालिका १७ बस्ने २८ वर्षीय विक्रम चौधरी सहित ३ जनालाई १ ग्राम ५१० मिलिग्राम अवैध लागूऔषध खैरो हेरोइन सहित प्रहरीले पक्राउ गरेको छ ।
सोही उपमहानगरपालिका १५ स्थित पार्वती रेष्टुरेण्टमा खाजा खाइरहेका व्यक्तिहरूसँग लागूऔषध रहेको भन्ने सूचनाको आधारमा जिल्ला प्रहरी कार्यालयबाट खटिएको प्रहरीले जाँच गर्ने क्रममा उक्त लागूऔषध सहित फेला पारी उनीहरुलाई पक्राउ गरेको प्रहरीले जनाएको छ ।