संखुवासभा । संखुवासभाको मादी नगरपालिका ६ मा आज बिहान बस दुर्घटना हुदा मृत्यु हुनेको संख्या १४ पुगेको छ ।
मादी ६ को सात घुम्तीमा भएको बस दुर्घटनामा परेर अहिलेसम्म १४ जनाको मृत्यु भएको जिल्ला प्रहरी कार्यालयका प्रहरी नायब उपरीक्षक लालध्वज सुवेदीले जानकारी दिए ।
बिहिबार बिहान ७ः३० बजे मादीको ओखरबोटे बजारबाट झापाको दमकतर्फ आउँदै गरेको बस दुर्घटनामा परेको थियो । मृतकको पहिचान भइसकेको छैन । बस दुर्घटनामा परेका ५ जनाको जीवितै उद्धार गरिएको संखुवासभा प्रहरीले जनाएको छ ।
दुर्घटनामा परेका मृतकको विवरण संकलन भइरहेको प्रहरीले बताएको छ । बस सडकबाट करिब ३०० मिटर तल खसेको छ ।
घटनास्थलमा सशस्त्र प्रहरी, नेपाल प्रहरी र स्थानीयले उद्धार गरिरहेका छन् । दुर्घटनाको विस्तृत विवरण आउन अझै केही समय लाग्ने संखुवासभा प्रहरीले जनाएको छ ।
