काठमाण्डौं । हुण्डी कारोबारी भएको आंशकामा प्रहरीले संघिय राजधानीको ताहाचलबाट डेढ करोड रुपैयाँ सहित २ जनालाई नियन्त्रणमा लिएको छ । प्रहरीले नियन्त्रणमा लिएकाहरुमा काठमाण्डौं महानगरपालिका १९ टङ्केश्वरी घरभई कीर्तिपुर नगरपालिका ३ बस्ने २४ वर्षीय बिक्की खड्गी र काठमाण्डौं महानगरपालिका १३ ताहचल बस्ने भारत पश्चिम बङ्गाल दार्जलिङ सिलिगुरी घर भएका ३२ वर्षीय अमितकुमार अग्रवाल रहेको प्रहरीले जनाएको छ ।
काठमाण्डौं महानगरपालिका १३ ताहचल डेरा गरी काठमाण्डौंको मख्खनमा बिमला इन्टरनेशनल प्रालि सञ्चालन गरी नक्कली गर–गहनाको होलसेल कारोबार गरी बस्ने अमितकुमार अग्रवाल समेतका व्यक्तिहरूले राजस्व छली गैरकानूनी रूपमा हुण्डी मार्फत वित्तिय कारोबार गर्दै आइरहेको भन्ने बिशेष सूचनाको आधारमा महानगरीय अपराध महाशाखाबाट खटिएको प्रहरीको टोलीले अग्रवाल बस्ने घरको गेट अगाडि बिकी खड्गीलाई फेला पारी सोधपुछ गर्दा उनले कालीमाटीस्थित जीवनदृष्टी बहुउद्धेश्यीय सहकारी संस्थाबाट ५० लाख रूपैयाँ ल्याई अमित कुमारको कोठामा पुर्याइ दिएको बताएपछि अग्रवालको डेरा तलासी गर्दा नेपाली नगद १ करोड ५० लाख फेला परेको महाशाखाले जानकारी दिएको हो ।
दुवै जनाबाट विभिन्न बैंकका चेकहरु, भौचर प्याड, कारोबार सम्बन्धी विभिन्न कागजातहरू, २ थान ल्यापटप र २ थान मोबाइल समेत प्रहरीले बरामद गरेको छ ।
दुवैलाई थप अनुसन्धान तथा कारबाहीको लागि राजश्व अनुसन्धान बिभाग हरिहरभवन ललितपुर बुझाइएको महाशाखाले जनाएको छ ।
