काठमाण्डौं । बैंकिङ कसूर मुद्दामा फरार रहेका भनिएका तारकेश्वर नगरपालिका २ बस्ने ३८ वर्षीय विश्वनाथ अधिकारीलाई बिहीबार प्रहरीले पक्राउ गरेको छ ।
उच्च अदालत पाटनको २०७८ कात्तिक २९ गतेको फैसलाले १० दिन कैद र ६२ लाख ८ हजार रुपैयाँ जरिवाना ठहर भई फरार रहेका उनलाई प्रहरी प्रधान कार्यालय केन्द्रीय अनुसन्धान ब्यूरो महाराजगञ्जबाट खटिएको प्रहरीको टोलीले उनकै घरबाट पक्राउ गरेको हो ।
विश्वनाथले २०७६ र २०७७ सालमा आफ्नो खातामा पर्याप्त मौज्दात रकम नभएको भन्ने जानी जानी आफ्नो नेपाल बैंक लिको न्यूरोड शाखाबाट रकम भुक्तान हुने भनि पीडितलाई झुक्यानमा पारी चेकहरू दिएका थिए ।
पिडीतले भुक्तान नपाएको भन्दै उजुरी परेका कारण अदालतले उनी उपर १० दिन कैद र ६२ लाख भन्दा बढी जरिवाना हुने फैसला गरेको थियो ।
पक्राउ परेका विश्वनाथलाई फैसला कार्यान्वयनको लागि जिल्ला अदालत ललितपुरमा बुझाइएको प्रधान कार्यालय केन्द्रीय अनुसन्धान ब्यूरो महाराजगञ्जले जनाएको छ ।
