काठमाण्डौं । काठमाण्डौंको १ सहकारीले निक्षेपकर्ताहरुको बचत रकम ठगी गरेको आरोपमा प्रहरीले २ जना संञ्चालकलाई नियन्त्रणमा लिएको छ । महानगरपालिका ३१ पुरानो बानेश्वरस्थित भरोसा नेपाल बहुउद्देश्यीय सहकारी संस्थाका १५ जना निक्षेपकर्ताहरूको ६ करोड २५ लाख रुपैयाँ रकम ठगी गरेको अभियोगमा २ जना सञ्चालकलाई प्रहरीले पक्राउ गरेको हो ।
पक्राउ पर्नेहरूमा उक्त सञ्चालक समितिका अध्यक्ष काठमाण्डौं महानगरपालिका ३० बस्ने ४२ वर्षीय सुरज बस्नेत र उपाध्यक्ष काठमाण्डौं महानगरपालिका १६ पकनाजोल बस्ने ५७ वर्षीय शिव पाण्डे रहेको प्रहरीले जनाएको छ ।
निक्षेपकर्ताहरुले उक्त संस्थामा बचत तथा आवधिक खाता खोली जम्मा गरेको रकम सहकारीका संचालकहरुले हिनामिना गरी आफूखुशी सहकारीको खातामा नराखी आफ्नै परिवारका सदस्य र आफन्तहरुका नाममा राखेर ठगी गरेको उजृरीको आधारमा उनीहरुलाई प्रहरले पक्राउ गरेको हो ।
ठुलै रकम ठगी गरेर सहकारीमा ताला लगाएर फरार रहेका उनीहरुलाई प्रहरी प्रधान कार्यालय केन्द्रीय अनुसन्धान ब्यूरो महाराजगञ्जबाट खटिएको प्रहरीको टोलीले सुरजलाई काठमाण्डौं अनामनगर र शिवलाई पकनाजोलबाट पक्राउ गरेको हो ।
अन्य बचतकर्ताहरुले समेत उक्त सहकारीमा आफ्नो निक्षेप तथा ब्याज रकम नपाई कानुनी कारवाही गर्नुपर्ने भएमा सम्पर्क गर्न उक्त ब्यूरोले सबैमा अनुरोध गरेको छ ।
ब्यूरोले पक्राउ परेका र सहकारीका बिषयमा थप अनुसन्धान भइरहेको जनाएको छ ।