काठमाण्डौ । पूर्व प्रधानमन्त्री तथा नयाँ शक्ति नेपालका संयोजक डा.बाबुराम भट्टराईले नेपालले एमसिसी पास गर्न नसके सामाजिक द्वन्दमा फस्ने चेतावनी दिएका छन् । अमेरिकी अनुदान सहयोग एमसिसी संसदमा टेबुल भए पनि पास गर्ने विषयमा सत्ता गठबन्धनभित्रै मतभेद देखिएपछि डा.भट्टराईले त्यस्तो चेतावनी दिएका हुन् ।
उनले दुई विकल्प अगाडि सारर्दै पहिलो विकल्प, गठबन्धन दल सबैले एमसिसीको पक्षमा भोट हाल्नुपर्ने भएता पनि अहिलेको परिस्थितिमा यो सम्भव नदेखिको जनाए ।
भट्टराईले अर्को विकल्प अगाडि सारदै नयाँ समीकरण हुन आवश्यक भएको बताए । नयाँ समीकरण गर्न प्रमुख प्रतिपक्ष एमालेको साथ चाहिन्छ । यो विषयमा कांग्रेस र एमाले नेताहरूबीच छलफल चले पनि कुनै सहमति जुटेको छैन ।
खासगरी प्रधानमन्त्री शेरबहादुर देउवाले एमसिसी पारित गर्न एमालेको साथ खोजे पनि अध्यक्ष केपी ओलीले ‘गठबन्धन भत्काउनुपर्ने’ अनि मात्र पास गर्ने सर्त छन् ।
डा.भट्टराईले सामाजिक सञ्जाल टुइटरमा लेख्छन्, ‘एमसिसीको डढेलो लगाएपछि यसलाई निभाउने जिम्मा सबै दलको हो । सामान्य संसदीय कर्मकाण्ड पूरा गरेर पास गर्दा यसको भित्री/बाहिरी स्वीकार्यता रहन्न । यो विन्दूमा आएर पास नगर्दा देश झन् ठूलो सामरिक द्वन्द्वमा फस्छ । कि गठबन्धन दल सबैले पक्षमा भोट हाल्नपर्यो कि नयाँ समीकरण बन्नुपर्यो ! अर्को बाटो छैन !’
पाँचदलीय गठबन्धनमा राष्ट्रिय जनमोर्चा सडक आन्दोलनमा छ । माओवादी केन्द्र र नेकपा एकीकृत समाजवादी सत्तामा रहे पनि एमसिसीको विरोधमा आफ्ना जनवर्गीय संगठनलाई आन्दोलनमा उतार्दै आएका छन् । जसपाभित्र पनि दुई धार छ ।
गठबन्धनको नेपाली कांग्रेस पास गर्ने पक्षमा रहे पनि एक्लैले बहुमत पुग्दैन ।
