काठमाण्डौं । ई–सेवाबाट बोनस पाइन्छ भन्दै ठगी गर्ने २ जनालाई प्रहरीले पक्राउ गरेको छ । रौतहट माधबनारायण नगरपालिका २ घर भई पर्सा वीरगञ्ज बस्ने सुभम साह र बारा महागढिमाई नगरपालिका १० घर भई पर्सा वीरगञ्ज बस्ने सर्फराज आलमलाई प्रहरीले पक्राउ गरेको हो ।
ई–सेवाले बोनस बाँड्दैछ, आफ्नै ई–सेवामा ५० हजार रकम जम्मा गरेमा २ हजार ५०० रुपैयाँ बोनस पाईन्छ भनी ९८२९४०२०४९ नम्बरबाट ई–सेवाको कर्मचारी बोलेको लगायतका विभिन्न कुराहरू गरी बिश्वासमा पारी ई–सेवा आईडीको ओटिपी प्राप्त गरे पश्चात बैंक खातामा समेत पहुँच बनाई ७ लाख २७ हजार ३४८ रुपैयाँ ठगी गरेको आरोपमा उनीहरुलाई आधारमा महानगरीय अपराध महाशाखा मिनभवनबाट खटिएको प्रहरीले जिल्ला प्रहरी कार्यालय पर्सासँगको समन्वयमा पक्राउ गरेको हो ।
ठगी गरेको उक्त रकमले टिकटकमा विक्रीको लागि राखिएको आईफोन १३ प्रो म्याक्स १ लाख ९० हजारमा किन्ने सहमती सहित पीडितको खाताबाट सिधै मोबाईल बिक्रेताको खातामा रकम रकमान्तर गरेको र सो मोबाइल वीरगंजबाट पाउने गरी पठाउन लगाएको महाशाखाले जनाएको छ ।
यसैगरी उनीहरूले ठगीको रकम विभिन्न सामान किन्न अन्य व्यक्तिहरुका खातामा समेत पठाएको अनुसन्धानमा क्रममा खुल्न आएको छ ।
पक्राउ परेका दुवैलाई थप अनुसन्धानको लागि महानगरीय प्रहरी परिसर काठमाण्डौंमा पठाईएको महाशाखाले जानकारी दिएको छ ।
