काठमाण्डौं । आज बिहान सम्पन्न खेलमा अर्जेन्टिनाले चिलीमाथि सकस पूर्ण जित निकालेको छ । फिफा विश्वकपको दक्षिण अमेरिकी छनोट अन्तर्गत चिलीस्थित स्टेडियो जोरोसमा सम्पन्न खेलमा अर्जेन्टिनाले घरेलु टोलीमाथि २–१ गोलअन्तरले जित निकालेको हो ।
खेलको नवौं मिनेटमै रोड्रिगो डी पउलको पासमा एन्जेल डी मारियाले गोल गर्दै अर्जेन्टिनालाई अग्रता दिलाएका थिए । तर, २० औं मिनेटमा चिलीका लागि मार्सेलिनो नुनेजको पासमा बेन बेरेटोन डियाजले गोल गर्दै खेल बराबरीमा ल्याए ।
खेलको ३४ औं मिनेटमा अर्जेन्टिनाले फेरि अग्रता बनायो । यसपटक लौटरो मार्टिनेजले गोल गरेका थिए । त्यसपछि दुबै टिमले गोल गर्न नसक्दा अर्जेन्टिनाले २–१ ले खेल आफ्नो पक्षमा पार्यो ।
आज बिहाननै सम्पन्न अन्य खेलहरुमा ब्राजिल र इक्वेडर १–१ को बराबरीमा रोकिँदा उरुग्वेले पाराग्वेमाथि १–० गोलअन्तरले जित निकालेको थियो ।
छनोटको शीर्ष दुईमा रहेका ब्राजिल र अर्जेन्टिन विश्वकपमा छनोट भइसकेका छन् । समान १४ खेलबाट शीर्षस्थानमा रहेको ब्राजिलको ३६ अंक छ भने दोस्रो स्थानको अर्जेन्टिनाको ३२ अंक छ ।
