साँकेतिक तस्बिर
काठमाण्डौं । काठमाण्डौंको त्रिपुरेश्वरस्थित महालक्ष्मी इशान इन्टरप्राइजेज प्रालि र अनेष्ट सप्लायर्सबाट अमेरीकन ब्राण्ड थ्रीएम मास्कको नक्कल मास्क सहित ४ जनालाई प्रहरीले नियन्त्रणमा लिएको छ ।
पक्राउ पर्नेहरुमा काठमाण्डौं महानगरपालिका ११ त्रिपुरेश्वरस्थित महालक्ष्मी इशान इन्टरप्राइजेजका सञ्चालक ललितपुर टिकाथली घर भएका ३४ वर्षीय बुद्दिबहादुर कार्की, काठमाण्डौं भोटेबहाल बस्ने भारत राजस्थान घर भएका नक्कली थ्रीएम मास्कको सप्लायर्स २० वर्षीय यश अग्रवाल, २० वर्षीय श्री यान्स लावटी र ललितपुर सातदोबाटो बस्ने अनेष्ट सप्लायर्सका म्यानेजर संखुवासभा सभापोखरी गाउँपालिका १ घर भएका २३ वर्षीय मुक्तिप्रसाद पोखरेल रहेको महानगरीय प्रहरी परिसर काठमाण्डौंले जनाएको छ ।
पक्राउ परेकाहरुबाट ६ हजार ११४ थान थ्रीएम समेत नियन्त्रणमा लिएको प्रहरीले जनाएको छ । काठमाण्डौं उपत्यकाको बिभिन्न स्थानमा अमेरीकन ब्राण्ड थ्रीएम मास्क तथा थ्रीएम हेल्थक्येर युएसको नक्कल गरी कम गुणस्तरका माक्स नेपाली बजारमा बिक्री बितरण भइरहेको भन्ने विशेष सूचनाको आधारमा महानगरीय प्रहरी परिसर काठमाण्डौंबाट खटिएको प्रहरीले महालक्ष्मी इशान इन्टरप्राइजेज प्रालि र अनेष्ट सप्लायर्समा जाँच गर्ने क्रममा कम गुणस्तरको मास्क फेला पारे पछि उनीहरुलाई पक्राउ गरीएको हो ।
प्रहरीले महालक्ष्मी इशान इन्टरप्राइजेजबाट ४ हजार १९४ थान र अनेष्ट सप्लायर्सबाट १ हजार ९२० थान नक्कली थ्रीएम मास्क प्रहरीले बरामद गरेको हो ।
उनीहरुलाई आवश्यक अनुसन्धान तथा कारवाहीको लागि वाणिज्य आपूर्ति तथा उपभोक्ता संरक्षण बिभाग बबरमहल काठमाण्डौं बुझाईएको महानगरीय प्रहरी परिसर काठमाडौंले जनाएको छ ।
