पोखरा । पोखरामा जारी २०औं संकरणको आहा रारा गोल्डकपको पोखरा रंगशालामा आइतबार भएको खेलमा पुलिसलाई हराउँदै मनाङले सेमिफाइनलमा स्थान बनाएको छ ।
आइतबार दिउँसो सम्पन्न खेलमा पुलिसले मनाङसँग २–० गोलको हार बेहोरेको हो । योसँगै पुलिसको यो सिजनको यात्रा टुंगिएको छ । यता, मनाङ र पुलिसकै लिगको खेलमा पनि मनाङले जित निकालेको थियो ।
पोखरा रंगशालामै भएको त्यो खेलमा पुलिसले ३–० गोलको हार बेहोरेको थियो । आइतबारको खेलमा मनाङलाई जित दिलाउन रुपेश केसी र ओलावाले अफिजले गोल गरे ।
खेलको पहिलो हाफमा गोल नभए पनि दोस्रो हाफमा २ गोल गर्दै मनाङले जित निकालेको हो । अब मनाङले सेमिफाइनलमा त्रिभुवन आर्मी क्लब र थ्रिस्टार क्लबको विजेतासँग खेल्नेछ ।