एजेन्सी । आर्थिक संकटका कारण टाट पल्टिन खोजेको श्रीलंकालाई भारतले २ अर्ब ४१ करोड १५ लाख अमेरिकी डलर उपलब्ध गराउने इच्छा ब्यक्त गरेको छ । बिदेशी ऋणका कारण अर्थतन्त्र संकटमा परेको श्रीलंकालाई भारतले सहयोग गर्ने इच्छा व्यक्त गरेको हो ।
भारतले पहिलो चरणमा श्रीलंकालाई ५० करोड अमेरिकी डलर ऋण उपलब्ध गराउने घोषणा गरेको छ ।
भारतीय विदेशमन्त्री डा.एस जयशंकर र श्रीलंकाका अर्थमन्त्री बसिल राजापाक्षेबीच भएको भर्चुअल वार्ता मा विदेशमन्त्री जयशंकरले उत्तकुराको जानकारी गराएको थियो ।
उनले श्रीलंकाको संकटमा भारतको सहानुभूति र साथ रहने भन्दै आर्थिक चुनौती सामना गर्न श्रीलंकालाई भारतले सहयोग गर्ने बताएका थिए । कोरोना महामारीका कारण उत्पन्न आर्थिक चुनौती सामना गर्न भारत र श्रीलंकाबीच सहकार्यमा जयशंकरको जोड थियो ।
समाचार एजेन्सी एएनआईका अनुसार ‘सार्क करेन्सी स्वाव एरेन्जमेन्ट’अन्तर्गत भारतले श्रीलंकालाई यसबीचमा ४० करोड अमेरिकी डलर उपलब्ध गराएको छ । भारतको पोलिसी रिसर्च ग्रुपका अनुसार अमेरिकी डलर अभावका कारण श्रीलंकाले पर्याप्त इन्धन खरिद गर्न समेत सकेको छैन।
श्रीलंकाले यो वर्ष मात्रै ७ अर्ब अमेरिकी डलर बिदेशी ऋण तथा ब्याजबापत् भुक्तानी गर्नुपर्ने छ । जनवरीमा मात्रै ५० करोड र जुलाईमा १ अर्ब अमेरिकी डलर कोलम्बोले तिर्नुपर्नेछ । श्रीलंकाले चीनलाई पनि ठूलो ऋण तिर्नु बाँकी छ ।
श्रीलंकाको कुल आयात गर्नुपर्ने सामानको २० प्रतिशत इन्धन हो । मासिक एक अर्ब डलरभन्दा कम बराबर उसको निर्यात हुने गरेको छ भने श्रीलंकाले ३५ करोड डलर इन्धनका लागि मात्रै खर्च गर्नुपर्ने अवस्था छ ।