पोखरा । टाइगर ग्रुप अफ पोखरा नेपालको आयोजना, नेपाल भलिवल संघको स्विकृतीमा ‘दोश्रो टाइगर कप आमन्त्रित खुल्ला क्लव च्याम्पियनसिप महिला÷पुरुष भलिवल प्रतियोगिता २०७८’ को सम्पूर्ण तयारी पुरा भएको आयोजकले जनाएको छ । टाइगर ग्रुपले आज पोखरामा पत्रकार सम्मेलन गर्दै तयारी पुरा भएको जनाएको हो ।
शुश्री मिडिया प्रा.लीको मुख्य प्रायोजनमा पोखरा रंगशालामा यहि पुष २६ गतेबाट राउण्ड रोविन लिगको आधारमा सञ्चालन हुने प्रतियोगितामा महिला र पुरुष गरी १० टिमको सहभागिता हुने संस्थाका अध्यक्ष नारायण प्रसाद शर्माले जानकारी दिए । प्रतियोगिताको अन्तिम तयारी बारे जानकारी गराउँदै अध्यक्ष शर्माले भने–“यस क्षेत्रमा भलिवलको लोकप्रियता संगै राष्ट्रिय टिममा गण्डकी प्रदेशबाट उत्पादित खेलाडीहरुको लामो समयदेखिको उपस्थितीका साथै भलिवल खेलको विकासमा योगदान दिन यो प्रतियोगितालाई निरन्तरता दिएका छौं ।”
प्रतियोगितामा महिला तर्फ विभागिय टिमहरुमा नेपाल आर्मी क्लव, नेपाल पुलिस र शसस्त्र प्रहरीबल, न्यू डायमण्ड र आयोजक संस्था टाइगर ग्रुप अफ पोखरा नेपाल रहको छ । आयोजकको टिममा नेपाल महिला भलिबलकी क्याप्टेन अरुणा शाहीको नेतृत्वमा श्रीलंकका महिला भलिबलका क्याप्टेन सहित ३ जना खेलाडीहरूको सहभागिता रहनेछ । त्यस्तै पुरुषतर्फ गण्डकी प्रदेश, विभागिय टिमहरू नेपाल आर्मी क्लव, नेपाल पुलिस क्लव र शसस्त्र प्रहरीवल, टिप टप हेल्प नेपाल स्पोर्टस क्लवको टिम रहेका छन् । केही टिममा छिमेकी राष्ट्र भारतका टिम क्याप्टेन सहितका खेलाडीहरूको सहभागिता रहनेछ ।
प्रतियोगिताको उपाधि विजेता महिला/पुरुष उपाधी विजेता टिमलाई समान नगद ३–३ लाख, उपविजेता महिला/पुरुष टिमलाई समान नगद १ लाख ५० हजार, तेश्रो हुने महिला/पुरुष टिमलाई समान स्वरुप ७५ हजार र सान्त्वना हुने महिला/पुरुष टिमलाई ३५ हजार प्रदान गर्ने पत्रकार सम्मेलनमा जानकारी गराईएको थियो । त्यस्तै गरी महिला तथा पुरुष तर्फ उत्कृष्ट १–१ खेलाडीलाई २५–२५ हजार तथा हरेक विद्याका उत्कृष्ट खेलाडीहरुलाई १०–१० हजार सहित र ट्रफीद्वारा सम्मान गरिने आयोजकले जानकारी दिएको छ ।
प्रतियोगिता अवलोकनका लागि साउथ एशिया सेन्ट्रल भलिवलका अध्यक्ष मोहमद लतिफ पोखरा आउने कार्यक्रम तय भएको छ । पुष २६ गते दिउसो १ बजे हुने उद्घाटन खेलमा पुरुष तर्फको डिफेण्डिङ च्याम्पियन गण्डकी प्रदेश र नेपाल ए.पि.एफ क्लब भिड्ने भएका छन् । पहिलो राउण्ड रोविन लिग अन्तर्गतका खेलहरु भने विहान ८ बजेबाटनै शुरु हुने र दैनिक महिला र पुरुषतर्फका गरी ४ खेलहुने आयोजकले जनाएको छ ।
दर्शकहरूका लागि अस्थायी प्याराफिट निर्माण, जेष्ठ नागरिक लगायत फरक क्षमता भएका दर्शकहरूलाई खेल हेर्न छुट्टै व्यवस्था, राष्ट्रिय तथा अन्तर्राष्ट्रिय खेलाडीहरुलाई बस्नको लागि विशेष व्यवस्था गरिएको छ । साथै प्रतियोगिताका लागि प्रवेश शुल्क २०० र ३०० निर्धारण गरिएको आयोजकले जनाएको छ ।
प्रतियोगिता अवधीभर नेपाल टेलिकमले ५० व्यालेन्स सहितको सिम निशुल्क वितरण गर्नेछ भने ई–सेवा रेमिटबाट प्रत्येक दिनको म्याचको ‘म्यान अफ द म्याच’को पुरस्कार राशी नगद ५ हजार खेलाडीले प्राप्त गर्नेछन् । साथै केएफसीले महिला तथा पुरुष विजेता टिमका खेलाडीहरुलाई उपहार स्वरुप डिनरको व्यवस्था गरेको संयोजक ज्ञवालीले जनाए ।
प्रतियोगिताको गण्डकी प्रदेश सरकारका मुख्य मन्त्री कृष्ण चन्द्र नेपाली पोखरेलले उद्घाटन गर्ने कार्यक्रम तय भएको आयोजकले जनाएको छ ।