काठमाण्डौं । सामाजिक सञ्जाल फेसबुक पेज मार्फत् अनलाईन ठगी कार्यमा संलग्न बर्दियाका २३ बर्षिय पुरुषलाई प्रहरीले पक्राउ गरेको छ ।
बारबर्दिया नगरपालिका १० बस्ने २३ वर्षीय रमेश थारुलाई प्रहरीले पक्राउ गरेको हो । थारुले विभिन्न व्यक्तिहरुको नागरिकताको फोाटोकपी फेला पारी त्यसको दुरुपयोग गरी नक्कली फेसबुक पेज मार्फत डिएसएलआर क्यामेराको खरिद तथा विक्रीमा ठगी गरेको आरोपमा प्रहरीले पक्राउ गरेको हो ।
आकर्षक विज्ञापनमा राखेर ७८ हजार पर्ने क्यानन ८० मोडल क्यामेरा खरिदको लागि आधा रकम पहिला पठाउन भनी सामान डेलिभरीपूर्व नै ग्राहकहरूको केही रकम आईएमई पे एप, ई–सेवा मार्फत पठाउन लगाई सामान डेलिभरी नदिई सम्पर्क विहिन भएको भन्ने उजुरी परे पछि थारुलाई पक्राउ गरिएको महानगरीय अपराध महाशाखा मिनभवनले जनाएको छ ।
थारुलाई प्रहरीको टोलीले ईलाका प्रहरी कार्यालय कोहलपुर बाँकेसँगको समन्वयमा पक्राउ गरेको हो ।
उनलाई ठगी सम्बन्धी कसूरमा आवश्यक कारवाहीको लागि महानगरीय प्रहरी परिसर टेकु बुझाईको महाशाखाले जनाएको छ ।