काठमाण्डौं । एसियन सिनियर सेन्ट्रल जोन पुरुष तथा महिला भलिबल च्यालेन्ज कपमा नेपालले लगातार दोस्रो जित हात पारेको छ ।
ढाकाको मिरपुरस्थित सहिद सुरवार्दी राष्ट्रिय इन्डोर स्टेडियममा शुक्रबार नेपालले महिलातर्फ माल्दिभ्सलाई ३–० को साझो सेटमा पराजित गरेको हो ।
नेपालले खेल २५–११, २५–९ र २५–५ ले सोझो सेटमा हराएको हो । यसअघि नेपालले आफ्नो पहिलो खेलमा श्रीलंकामाथि ३–२ को रोमाञ्चक जित हात पारेको थियो ।
यो जितसँगै साविक विजेता नेपालले फाइन सम्भावनालाई बलियो बनाएको छ । महिलातर्फ ६ देशको सहभागिता रहेको प्रतियोगितामा शीर्ष २ टोलीले उपाधिका लागि प्रतिस्पर्धा गर्नेछन् ।
नेपाली पुरुष टोलीले पनि आजै उज्वेकिस्तानको सामना गर्नेछ । यो खेल नेपाली समय अनुसार साँझ ५ः४५ बजे सुरु हुनेछ ।
पहिलो खेलमा आयोजक बंगलादेशसँग ३–० को सोझो सेटमा पराजित नेपाल आज जित निकाल्ने प्रयासमा छ ।