नवलपुर । गैंडाकोट नगरपालिका १६ अमरापुरीस्थित पसलमा बसिरहेकी ४७ वर्षीया महिलाको सुनको सिक्री लुटेर भाग्दै गरेका ३ जनालाई १ थान पेस्तोल र ४ राउण्ड गोली सहित प्रहरीले पक्राउ गर्न सफल भएका छन् ।
पक्राउ पर्नेहरुमा नवलपरासी रुपौलिया गाउँपालिका १ बस्ने २२ वर्षीय राम बहादुर क्षेत्री, गैँडाकोट नगरपालिका १४ बस्ने ३४ वर्षीय आशिष सुनार र नवलपरासी सुस्ता गाउँपालिका ९ बस्ने २० वर्षीय संजय गुरुङ रहेको नवलपुर प्रहरीले जनाएको हो ।
ती महिला पसलमा बसिरहेको अवस्थामा लु ४० प ८४३६ नम्बरको मोटरसाइकलमा आएका ३ जनाले हतियार देखाई सुनको सिक्री लुटेर भाग्न खोज्दा राम बहादुरलाई स्थानीयले नियन्त्रणमा लिन सफल भएका थिए ।
घटनाको जानकारी पाएको ईलाका प्रहरी कार्यालय गैंडाकोट र अस्थाई प्रहरी पोष्ट बेल्डिहाबाट खटिएको प्रहरी टोलीले क्षेत्रिलाई तत्काल नियन्त्रणमा लिई अन्यको खोजी गर्ने क्रममा गैंडाकोट नगरपालिका १४ बाट संजय गुरुङ र आशिष सुनारलाई पक्राउ गर्दा उनीहरुको साथमा रहेको पेस्तोल र सोही पेस्तोलमा लाग्ने ४ राउण्ड गोली समेत नियन्त्रणमा लिन सफल भएको हो ।
पक्राउ परेकाहरुले हतियार कहाँ बाट ल्याए भन्ने बारेमा प्रहरीले अनुसन्धान थालेको जनाएको छ ।
