काठमाण्डौं । सरकारले समयमा भूकम्प प्रभावितहरूलाई निजी आवास निर्माणका लागि किस्ता उपलब्ध गराउन नसकेपछि म्याद थप्ने तयारी गरेको छ । निजी आवास निर्माणका लागि मंसिर मसान्तसम्म बाँकी किस्ता उपलब्ध गराइसक्ने यसअघि नै सरकारले निर्णय गरेको थियो ।
१ एक लाख ५८ हजार ४४८ घरधनीलाई सरकारले रकम उपलब्ध गराउन बाँकी रहेको छ । सहरी विकास मन्त्रालयका सचिव मणिराम गेलालका अनुसार पनि सोही कारण म्याद थप गर्नुपर्ने देखिएको हो । अहिले निजी आवास निर्माणका लागि ८ अर्ब रुपैयाँ आवश्यक देखिन्छ । तर, ३ अर्ब रुपैयाँ मात्र विनियोजित भएकाले पनि तत्काल म्याद थप्नुपर्ने आवश्यकता रहेको उनको भनाइ छ ।
बिहीबार संसद्को विकास तथा प्रविधि समितिमा अद्यावधिक प्रगति प्रस्तुत गर्दै उनले अनुदान सम्झौता गरेकामध्ये दोस्रो र तेस्रो किस्ता लिन बाँकी लाभग्राही संख्या ७८ हजार ३०४ घर परिवार रहेको जनाकारी गराएका थिए । त्यस्तै, तेस्रो किस्ता लिन बाँकी लाभग्राही ४७ हजार १५२ र प्रबलीकरणतर्फ दोस्रो किस्ता लिन बाकी लाभग्राही संख्या ३२ हजार ९९२ रहेको पनि जानकारी गराए ।
सचिव गेलालका अनुसार अझै किस्ता लिन बाँकी कुल लाभग्राहीको संख्या १ लाख ५८ हजार ४४८ घर परिवार रहेको जानकारी दिए ।
