काठमाण्डौं । नेपाल प्रहरीले विभिन्न पदका लागी २ हजार ३०० भन्दा बढी नयाँ भर्नाको लागी आब्हान गरेको छ । नेपाल प्रहरीमा जनपद प्रहरी समूहतर्फ रिक्त प्रहरी निरीक्षक र प्रहरी जवान तथा प्रहरी कार्यालय सहयोगी पदका लागी २ हजार ३२० जनाको लागी आवेदन माग गरेको हो ।
प्रहरी प्रधान कार्यालयका अनुसार खुला प्रतियोगिताद्वारा समावेशी प्रावधान बमोजिम पदपूर्ति गर्न नयाँ भर्नाका आव्हान गरिएको छ ।
आवेदन माग भएका पदहरुमा प्रहरी निरीक्षक (जनपद) पदका लागि १४६ जना, प्रहरी जवान (जनपद) पदका लागि १ हजार ९७१ जना र प्रहरी कार्यालय सहयोगीमा २०३ जना गरी जम्मा २ हजार ३२० जनाका लागि आवेदन माग गरिएको छ ।
प्रहरी निरीक्षक पदका लागि महानगरीय प्रहरी कार्यालय रानीपोखरी तथा ७ वटै प्रदेश प्रहरी कार्यालयहरू, प्रहरी जवान र प्रहरी कार्यालय सहयोगी पदका लागि महानगरीय प्रहरी परिसरहरु काठमाण्डौं, भक्तपुर र ललितपुर, ७ वटै प्रदेश प्रहरी तालिम केन्द्रहरु विराटनगर, जनकपुर (हाल राजविराज सप्तरी), दुधौली सिन्धुली, पोखरा, बुटवल, सुर्खेत (हाल नेपालगंज) र दिपायल तथा ७७ वटै जिल्ला प्रहरी कार्यालयहरुमा दरखास्त फारम बुझाउन सकिने प्रहरी प्रधान कार्यालयले जनाएको छ ।
नयाँ भर्ना हुन इच्छुक नेपाली नागरिकहरुले यही मंसिर १९ गतेदेखि पुस २३ गतेसम्म सम्बन्धित कार्यालयहरुमा कार्यालय समयभित्र दरखास्त फारम बुझाउन सक्नेछन् ।
दरखास्त आव्हान सम्बन्धी विस्तृत विवरण सहितको सूचना तथा सम्बन्धीत पदको पाठ्यक्रम नेपाल प्रहरीको वेबसाइटमा समेत राखिएको छ ।
नेपाल प्रहरीको वेवसाइट : www.nepalpolice.gov.np
