काठमाण्डौँ । आज लाग्ने चन्द्रग्रहण नेपाली आकाशबाट नदेखिने हुनाले ग्रहण बार्नु नपर्ने नेपाल पञ्चाङ्ग निर्णायक समितिले जनाएको छ ।
आंशिकरूपमा लाग्ने र नेपाली आकाशबाट नदेखिने भएकाले समितिले स्वीकृति दिएका पात्रोमा यसबारे उल्लेख नभएको सदस्य सचिव सूर्यप्रसाद ढुङ्गेलले बताए ।
नेपाली समयानुसार दिउँसो शुक्रबार दिउसो १ः०३ बजेदेखि लाग्ने चन्द्रग्रहण अपराह्न ४ः३२ बजेसम्म रहने छ ।
एसियाका केही देश र अमेरिका, उत्तरी युरोप, अष्ट्रेलिया तथा प्रशान्त महासागरीय क्षेत्रलगायतबाट यो चन्द्रग्रहण देख्न सकिने नेपाल एष्टोनोमिकल सोसाइटीले जानकारी दिएको छ ।
नेपालबाट विरलै छायाँ जस्तो भागमात्र देखिने र नाङ्गो आँखाले त्यो पनि देख्न नसकिने नेपाल एष्टोनोमिकल सोसाइटीले जनाएको छ ।
यसपटकको चन्द्रग्रहण पहिले देखिनेभन्दा हल्का रेखा आकारमा देखिने खगोलविद्को दाबी छ ।
यसअघि सन् १४४० को फेब्रुअरी १८ मा सबैभन्दा लामो चन्द्र ग्रहण लागेको थियो । अब यति लामो चन्द्र ग्रहण ८ फेब्रुअरी २६६९ मा मा मात्र लाग्नेछ ।
यति लामो अवधिको चन्द्र ग्रहण ५८० वर्ष यता दोस्रो पटक लाग्न लागेको हो ।
