काठमाण्डौं । नेपाली महिला राष्ट्रिय क्रिकेट टोलीले आज अन्तर्राष्ट्रिय खेल खेल्दैछ । आइसिसी वुमन्स टी–२० एसिया छनोटको तयारीस्वरूप नेपालले कतारसँग ३ खेलको अन्तर्राष्ट्रिय टि–२० सिरिज खेल्न लागेको हो ।
सिरिजको पहिलो खेल मंगलबार दोहास्थित वेस्ट इन्ड पार्क इन्टरनेशल क्रिकेट मैदानमा नेपाली समय अनुसार मंगलबार दिउँसो ३ः४५ बजे सुरु हुनेछ । नेपाली महिला क्रिकेट टोलीले पहिलो पटक टि–२० अन्तर्राष्ट्रिय सिरिज खेल्न लागेको हो ।
नेपालले पछिल्लो पटक नेपाली महिला क्रिकेट टोलीले १३औं दक्षिण एसियाली खेलकुद अन्तर्गत डिसेम्बर ७ मा बंगलादेशविरुद्ध अन्तर्राष्ट्रिय खेल खेलेको थियो ।
सिरिजको दोस्रो खेल मंसिर १ र तेस्रो तथा अन्तिम खेल २ गते हुने छ । कतार भ्रमणपछि नेपाली टोली टी–२० वुमन्स विश्वकप एसिया छनोटका लागि मंसिर ३ मा युएई प्रस्थान गर्ने छ ।
टी–२० वुमन्स विश्वकप एसिया छनोटमा आयोजक युएइ सहित नेपाल, हङकङ, भुटान, कुवेत र मलेसियाको सहभागिता हुने छ ।
विश्वकप एसिया छनोट मंसिर ६ देखि १२ गतेसम्म हुने छ ।