साँकेतिक तस्बिर
हुम्ला । हुम्लाको सर्केगार्ड गाउँपालिकाका कर्मचारीहरुले आफुलाई तलब नदिएको भन्दै गाउँपालिकाको कार्यालयमा तालाबन्दी गरिदिएका छन् । बाल विकास केन्द्रका सहजकर्ता र विद्यालयका कर्मचारीले बढेको तलब गाउँपालिका नदिएको भन्दै पालिकामा ताला गरिदिएका हुन् ।
गाउँपालिका कर्मचारीको तलब वृद्धिका लागि गम्भीर नदेखिएपछि तालाबन्दी गरिदिएको प्रगति प्राविका सहजकर्ता रुप्सी छत्यालले जानकारी दिए । सर्केगाड गाउँपालिकाले वृद्धि भएको तलब नदिएको भन्दै सबै सहजकर्ता र विद्यालयका कर्मचारी मिलेर तालाबन्दी गर्नुपरेको छत्यालले बताए ।
जिल्लाका अधिकांश गाउँपालिकाले आन्तरिक स्रोतबाट व्यवस्था हुने गरी बाल विकासका सहजकर्ता र विद्यालयका कर्मचारीलाई तलबको व्यवस्था गरेको अवस्थामा सर्केगार्डले उक्त व्यवस्था नगरेकाले दबाब दिन तालाबन्दी गर्नुपरेको दुधकण्ड प्रावि रोडिकोटका बाल विकासका सहजकर्ता हाँसबहादुर छत्यालले जानकारी दिए ।
सर्केगार्ड गाउँपालिकामा ४ वटा मावि र २८ वटा प्राथमिक तथा आधारभूत विद्यालय छन् । आधारभूत र प्राथमिक सबै विद्यालयमा बाल विकासका कक्षा सञ्चालन हुँदै आएका छन् । ३२ जना विद्यालय कर्मचारी र बाल विकासका गरी ६० जना आन्दोलित भएका छन् ।
