एजेन्सी । न्यूजील्याण्डमा आजदेखि इच्छा मृत्यु सम्बन्धि कानुन लागु भएको छ । केही समयअघि भएको जनमत संग्रहमा इच्छा मृत्युसम्बन्धि कानुनको पक्षमा ६५ प्रतिशत मत परेपछि यो कानुन आजदेखि लागु भएको हो ।
लामो समयदेखि यस मुद्दाले न्यूजील्याण्डमा बहसको विषय बनाए पछि यसलाई जनमतसंग्रहबाट टुंगाइएको थियो । यस विषयमा न्युजील्याण्डकी प्रधानमन्त्री जेसिंडा आर्डनको समेत समर्थन रहेको छ ।
इच्छा मृत्युका लागि ६ महिना भित्र मृत्यु हुने किसिमका रोग लागेका विरामीले २ जना डाक्टरको सिफारिसमा इच्छा मृत्युवरण गर्न सकिने कानुनमा उल्लेख गरिएको छ ।
यो सँगै न्युजील्याण्ड इच्छा मृत्युसम्बन्धि कानुन बनाउने सिमित देशहरुमा सामेल भएको छ । फरक फरक शर्तहरुसहित अहिले स्वीट्जरल्याण्ड, नेदरल्याण्डस्, स्पेन, बेल्जियम, लक्जम्बर्ग, क्यानाडा, अस्ट्रेलिया र कोलम्बियालगायतका देशहरुमा इच्छा मृत्युसम्बन्धि कानुन लागु गरिएको छ ।
