जनकपुर । शुक्रबार गहनाको लोभमा महिलाको घाँटी रेटेर फरार ‘भुट्टाचोर’ नामका १ पुरुषलाई धनुषा प्रहरीले पक्राउ गर्न सफल भएको छ ।
घाँस काट्न गएकी महिलाको मंगलसुत्र र चाँदीको गहना लुट्न घाँटी रेटेर फरार भएका ‘भुट्टाचोर’ अर्थात रामभजन महतो सुडीलाई महोत्तरीबाट प्रहरीको टोलीले पक्राउ गरेको हो ।
धनुषाको विदेह नगरपालिका ६ गिद्धा बस्ने २५ वर्षीय सुडीलाई महोत्तरीको गोनरपुरा भन्ने स्थानबाट शुक्रबार राति पक्राउ गरेको प्रहरीले जनाएको छ ।
उनले गहना लुट्न शुक्रबार बिहान ११ः०० बजेको समयमा स्थानीय ५५ बर्षिया जमुनीदेवी मण्डल केवटको घाँटी रेटेर हत्या गर्ने प्रयास गरेका थिए ।
घटना लगत्तै फरार भएर ससुरालीमा बसिरहेका उनलाई प्रहरी चौकी तिनकोरियाको प्रहरी टोलीले पक्राउ गर्न सफल भएको हो ।
जमुनी देवीको प्रादेशिक अस्पताल जनकपुरमा उपचारपछि घर फर्किएकी छिन् । उनको घाँटीमा ९ वटा टाँका लगाइएको छ ।
