गुल्मी । गुल्मीमा गए राति जिप दुर्घटना हुँदा ३ जनाको मृत्यु र भने अन्य ६ जना घाइते भएका छन् ।
बुटवलबाट गुल्मीको सदरमुकाम तम्घास आउँदै गरेको लु. १ ज ४४९० नम्बरको जिप गए राति रेसुङ्गा नगरपालिका १० को पाँचरातेमा दुर्घटना भएको गुल्मी प्रहरीले जनाएको छ ।
दुर्घटनामा परी ज्यान गुमाउनेमा मुसिकोट नगरपालिका २ जलजलेका ७० वर्षीय क्षेत्रबहादुर थापा, सोही ठाउँका ४६ वर्षीया राधिका थापा र मुसिकोट नगरपालिका ३ चुँदारी गाउँका १९ वर्षीया सङ्गीता सुनार रहेको जिल्ला प्रहरी कार्यालयका प्रहरी उपरीक्षक गोपालचन्द्र भट्टराईले जानकारी दिए ।
उनीहरुको उपचारका क्रममा तम्घासस्थित गुल्मी अस्पतालमै मृत्यु भएको थियो । दुर्घटनामा परी घाइते भएकामध्ये ५ जनालाई थप उपचारका लागि पाल्पा लगिएको छ भने १ जनाको गुल्मी अस्पतालमै उपचार भइरहेको प्रहरीले जनाएको छ ।
दुर्घटना लगत्तै नेपाल प्रहरी, सशस्त्र प्रहरी र नेपाली सेनाको टोलीले उद्धार गरेको थियो । जिप अनियन्त्रित हुदा सडकबाट ५०० मिटर लत खसेको प्रहरीले जानकारी दिएको छ ।
