काठमाण्डाैं । आज विजयादशमी अर्थात टीकाको दिन । आजका दिन मान्यजनबाट टीका र जमरा लगाइ आर्शिबाद थाप्ने हाम्रो पुरानो प्रचलन नै हो ।
नेपाल पञ्चाङ्ग निर्णायक समितिले टीका लगाउने उत्तम साइत भनेर १० बजेर २ मिनेटलाई तोकिदिएको छ । यस कारण जति सुकै काम र ब्यस्तता भएता पनि साईनै कुरेर टीका थाप्नु सबै भन्दा उत्तम हो ।
यसको मतलब १० बजेर २ मिनेटभन्दा अगाडि वा पछाडि टीका लगाउनै हुँदैन त ? भन्ने जिज्ञासा पनि हजुरहरुमा होला । हुन्छ । आज बिहान ८ः१९ बजे देबी विसर्जन गरेपछि जुनसुकै समयमा मान्यजनबाट टीका–जमरा लगाएर आशिर्वाद लिन सकिन्छ । तर नेपाल पञ्चाङ्ग निर्णायक समितिका पूर्वअध्यक्ष प्राडा रामचन्द्र गौतमका अनुसार देवी विसर्जन नगरी टीका लगाउन भने नहुने बताउछन् ।
आजका दिन घटस्थापना गरिएको पूर्ण कलशबाट अभिषेक गरी नवदुर्गाको प्रसादस्वरूप रातो टीका र जमरा लगाउने परम्परा छ । केही जाति र सम्प्रदाय विशेषले भने आज सेतो अक्षताको टीका लगाएर पनि विजयादशमी पर्व मनाउँछन् ।
असत्यमाथि सत्य र आसूरी शक्तिमाथि दैवी शक्तिको विजयका रूपमा बडादशैं पर्व मनाउने प्रचलन रही आएको हो ।