अछाम । बेहुलीसहित जन्ती पुर्याएर फर्किएको जीप आइतबार मध्यरातमा दुर्घटना हुँदा ४ जनाको निधन र १४ जना घाइते भएका छन् ।
निधन हुनेमा पञ्चदेवल विनायक नगरपालिका २ का १४ बर्षीय जीवन न्यौपाने, १८ बर्षीय सर्प बोहरा, १७ वर्षीय हिमाल नेपाली र वडा नम्बर ३ का १७ बर्षीयका जीवन जैसी रहेको अछाम प्रहरी प्रमुख डीएसपी तुलसीराम अर्यालले बताए ।
जैसीको घटनास्थलमै, न्यौपाने र बोहराको स्थानीय स्वास्थ्य संस्थामा र नेपालीको उपचारका क्रममा जिल्ला अस्पतालमा ल्याउँदै गर्दा बाटोमै निधन भएको अछाम प्रहरीले जानकारी दिएको छ ।
जीप दुर्घटनामा घाइते मध्ये मदन धामी र उपेन्द्र शाहीलाई थप उपचारका लागि नेपालगन्ज लगिइएको छ भने बाँकीको जिल्ला अस्पतालमा उपचार भइरहेको छ ।
पञ्चदेल विनायक नगरपालिका १ मा रहेको कुइकाको नदीको कच्ची सडकमा से १ च १७६३ नम्बरको बोलेरो जिप सडकबाट करिब २०० मिटर तल खसेको प्रहरीले जनाएको छ ।
बेहुली पुर्याएर राती करिब १२ः०० बजे फर्किने क्रममा जीप साँघुरो कच्ची सडकमा ब्याक गर्ने क्रममा दुर्घटना भएको अनुमान गरिएको छ ।
दुर्घटनाका बारेमा अनुसन्धान थालिएको प्रहरीको भनाइ छ ।