सुनसरी । सुनसरीको कोशी अन्तरर्गतको नेपाल भारत सिमा नजिकै अपहरणमा परेको बालकको नेपाल प्रहरीले १० घण्टामा नै सकुशल उद्वार गर्न सफल भएको छ ।
कोशी गाउँपालिका ७ नेपाल भारत सिमा नजिकैबाट अपहरणमा परेका १३ वर्षीय बालकलाई प्रहरीले सकुशल उद्दार गरे संगै अपहरणमा संलग्न रहेको अभियोगमा भारत सुपौल ग्राम पंचायत बलबदैपुर ६ बैरयाकमाल बस्ने मुकुम मिँयालाई प्रहरीले पक्राउ गरेको हो ।
बालक अपहरणमा परेको सूचना प्राप्त हुनासाथ जिल्ला प्रहरी कार्यालय सुनसरीबाट खटिएको प्रहरीले भारतीय प्रहरी समेतको सहयोगमा खोजी गर्ने क्रममा मिँयाले अपहरण गरी घरमा राखेको अवस्थामा फेला पारी ती बालकको उद्दार गरेको सुनसरी प्रहरीले जनाएको छ ।
नेपाली कामदार भारततर्फ ज्याला मजदुरीमा लैजाने कार्य गरेका मियाँ संग मजदुरहरु खोजी गरिदिने भन्दै कोशी गाउँपालिका ७ बस्ने भुल्टन सदा लगाएत ५ जनाले अग्रिम २ लाख पैसा भुक्तानी लिई कामदार नपठाएपछि मिँया लगाएतको समूहले भुल्टन सदाको गाउँकै ती बालकलाई अपहरण गरेको प्रहरी स्विकार गरेको प्रहरीले जनाएको छ ।
अपहरणमा परेका बालकलाई मियाँका समूहले कुटपिट समेत गरेको प्रारम्भिक अनुसन्धानबाट खुल्न आएको जिल्ला प्रहरी कार्यालय सुनसरीले जनाएको छ ।
अपहरण मुक्त भएका ती बालकलाई अभिभावकको जिम्मा लगाउनुका साथै मिया उपर अपहरण तथा शरीरबन्धक शीर्षकमा मुद्वा दर्ता गरी थप अनुसन्धान भइरहेको प्रहरीले जनाएको छ ।
