कपिलवस्तु/ईलाम । कपिलबस्तु र ईलामबाट श्रोत नखुलेको करिब ३४ लाख रुपैयाँ प्रहरीले बरामद गरेको छ ।
कृण्णनगर नगरपालिका २ मा रहेको बसपार्कबाट स्रोत नखुलेको २२ लाख ९१ हजार ८०० रुपैयाँ सहित बुद्दभूमि नगरपालिका ९ धमौली बस्ने २२ वर्षीय जिवनप्रसाद भुसाललाई प्रहरीले पक्राउ गरेको हो ।
शंकास्पद अवस्थामा हिँडिरहेका उनलाई ईलाका प्रहरी कार्यालय कृष्णनगरबाट खटिएको प्रहरीले जाँच गर्ने क्रममा झोला र शरीरबाट उक्त परिमाणको नगद फेला पारी पक्राउ गरिएको कपिलबस्तु प्रहरीले जनाएको छ ।
पक्राउ परेका भुसाललाई आवश्यक कारवाहीका लागि राजश्व अनुसन्धान कार्यालय बुटवल रुपन्दहेहीमा पठाइएको ईलाका प्रहरी कार्यालय कृष्णनगरले जनाएको छ ।
त्यस्तै गरी ईलामको सूर्योदय नगरपालिका ६ हर्कटे चोकबाट ११ लाख रुपैयाँ सहित २ जनालाई प्रहरीले पक्राउ गरेको हो ।
पक्राउ पर्नेहरुमा सोही नगरपालिका १० फिक्कल बस्ने ३५ वर्षीय अनुप अग्रवाल र सोही नगरपालिका ८ बस्ने ५१ वर्षीय कर्ण कठायत रहेका छन् ।
फिक्कलबाट झापातर्फ जाँदै गरेको मे. १ च ६४२४ नम्बरको कारलाई प्रहरी चौकी हर्कटेबाट खटिएको प्रहरीले चेक जाँच गर्ने क्रममा कारमा सवार उनको साथबाट उक्त परिमाणको नगद फेला पारी कार चालक कर्ण र कारमा सवार अनुपलाई पक्राउ गरेको प्रहरीले जनाएको छ ।
उनीहरुलाई आवश्यक कारवाहीको लागि राजस्ब अनुसन्धान कार्यालय इटहरी पठाइएको छ ।
