काठमाण्डौं । काठमाण्डौंमा जारी चौथो संस्करणको एभरेस्ट प्रिमियर लिग (इपिएल) मा पोखरा राइनोजले सानदार जित निकालेको छ ।
शनिबार कीर्तिपुरस्थित टियु मैदान भएको खेलमा पोखराले विराटनगर वारियर्समाथि ७ विकेटको जित निकालेको हो ।
यो हारसँगै विराटनगर प्रतियोगिताबाट बाहिरिने पहिलो टिम बनेको छ । यो विराटनगरको लगातार चौथो हार हो । पोखराको यो जित संगै ३ खेलमा ३ अंक नै जोडेर चौथो स्थानमा छ ।
पहिलो ब्याटिङ गर्दै विराटनगरले दिएको १७३ रनको लक्ष्य पोखराले १७.४ ओभरमा ३ विकेट गुमाउँदै लक्ष्य पुरा गरेको थियो ।
उसका लागि असेला गुरुरत्नेले विस्फोटक ब्याटिङ गर्दै अर्धशतक बनाए । उनी २४ बलमा ४ चौका र ३ छक्का प्रहार गर्दै ५० रन नटआउट रहे ।
यस्तै, रिचार्ड लेभीले २६ बलमा ४७ रन बनाउँदा सहान अरचहिगले ३६ बलमा ४३ रन बनाए । यस्तै कप्तान विनोद भण्डारी १५ रनमा नटआउट रहे । विराटनगरका प्रत्यिस जिसी, सिकन्दर राजा र हरि चौहानले समान १ विकेट लिए ।
यसअघि पहिला ब्याटिङ गरेको विराटनगरले निर्धारित ओभरमा ५ विकेटको क्षतिमा १७२ रन बनायो । उसका लागि आसिफ सेखले सर्वाधिक ४४ रन बनाउँदा सिकन्दर राजाले २९, सन्दीप रजालीले २८ र करण केसीले २४ रन बनाए ।
पोखराका विक्रम सोबले २ विकेट लिँदा नन्दन यादव, विवेक यादव र सहन अरचहिगले समान १ विकेट लिन सफल भएका थिए ।