साँकेतिक तस्बिर
काठमाण्डौं । ईडिभि भिषाको लागि नक्कली शैक्षिक प्रमाणपत्र पेश गरेको अभियोगमा प्रहरीले ३ जनालाई काठमाण्डौंका विभिन्न स्थानबाट पक्राउ गरेको छ ।
पक्राउ पर्नेहरूमा काठमाण्डौं महानगरपालिका १४ कलंकी बस्ने चितवन भरतपुर महानगरपालिका २९ जुगेडी घर भएका ३६ वर्षीय जीवन कार्की, चितवन खैरेनी नगरपालिका ३ घर भएका ३१ वर्षीय नविन दराई र काठमाण्डौं कोटेश्वर बस्ने रौतहट चन्द्रपुर नगरपालिका ९ सिंदुरेघारी घर भएका ३२ वर्षीय शिव रोक्का रहेको महानगरीय प्रहरीले जनाएको छ ।
नेपालस्थित अमेरिकी दूतावासमा ईडिभि २०२१ को नतिजामा नाम निकाली भिषा प्रक्रियाका लागि आवश्यक शैक्षिक योग्यता प्राप्त नगरेका केही व्यक्तिहरुले भिसा प्रयोजनको लागि १०ं२ को नक्कली शैक्षिक प्रमाणपत्र पेश गरेको भन्ने अमेरिकी दूतावासको सूचनाको आधारमा नबिन र शिवलाई महानगरीय अपराध महाशाखा काठमाण्डौंबाट खटिएको प्रहरीले काठमाण्डौं महाराजगंजबाट पक्राउ गरेको हो ।
पक्राउ परेकाहरुको बयानका आधारमा नबिनसँग जिबनले १ लाख ७० हजार रुपैयाँ लिई उक्त नक्कली शैक्षिक प्रमाणपत्र बनाई दिएको खुल्न आएपछि उनलाई समेत प्रहरीले काठमाण्डौं कलंकीबाट पक्राउ गरेको हो ।
उनीहरूलाई लिखत सम्बन्धि कसूर मुद्दामा आवश्यक अनुसन्धान कारबाहीका लागि महानगरीय प्रहरी परिसर टेकुमा बुझाईएको महाशाखाले जनाएको छ ।
