काठमाण्डौं । नोबल कोरोना भाइरस (कोभिड–१९)बाट आज थप १ हजार २८२ जनामा संक्रमण पुष्टी भएको छ ।
देशको विभिन्न प्रयोगशालामा १५ हजार ४८८ जनाको नमूना परिक्षण गर्दा सोमबार १ हजार २८२ जनामा संक्रमण देखिएको स्वास्थ्य तथा जनसंख्या मन्त्रालयले जनाएको छ ।
संक्रमण देखिएका मध्ये १२ हजार ८१ जनाको पीसीआर गर्दा ९७५ जना र ३ हजार ४०७ जनाको एन्टिजेन गर्दा ३०७ जनामा संक्रमण देखिएको छ ।
आज संक्रमण देखिएका सहित पीसीआर तर्फ ७ लाख ९२ हजार ३६७ जना र एन्टिजेन तर्फ ९० हजार ८५४ जनामा संक्रमण देखिएको छ ।
सोमबार नै थप १ हजार २६२ जनाले कोरोना जित्न सफल भएका छन् । यो सहित ७ लाख ६२ हजार ४१६ जनाले आज सम्म कोरोना जित्न सफल भएका छन् ।
त्यस्तै गरी पछिल्लो २४ घण्टामा संक्रमित मध्ये थप ७ जनाको ज्यान गएको छ । यो सहित संक्रमणका कारण ११ हजार १०३ जनाको ज्यान गईसकेको मन्त्रालयले जनाएको छ ।
