काठमाडौं । विश्व फुटबलको सर्वोच्च निकाय फिफाले सार्वजनिक गरेको वरीयतामा नेपाल यथास्थानमा नै रहेको छ ।
फिफाले बिहीबार सार्वजनिक गरेको नयाँ वरीयतामा नेपाल १६८औँ स्थानमा यथावत रहेको हो ।
अघिल्लो वरीयतामा पनि नेपाल १६८औं स्थानमै रहेको थियो । नेपालले हालै भारतसँग २ वटा मैत्रीपूर्ण खेल खेलेको थियो । जसमा पहिलो खेल १–१ गोलको बराबरीमा सकिएको थियो भने दोस्रो खेलमा नेपाल भारतसँग २–१ ले पराजित भएको थियो ।
नेपाल दक्षिण एसियाली राष्ट्रको वरीयतामा तेस्रो स्थानमा रहेको छ । नेपाल भन्दा अघि भारत १०७औँ र माल्दिभ्स १५८औँ स्थानमा रहेका छन् ।
नेपाल भन्दा पछाडि भुटान १८७औं, बंगलादेश १८९औं, पाकिस्तान १९८औं र श्रीलंका २०५औं स्थानमा रहेका छन् ।
नयाँ वरीयताको शीर्ष स्थानमा बेल्जियम यथावत रहेको छ भने दोस्रो स्थानमा ब्राजिल, तेस्रोमा इंग्ल्यान्ड, चौथोमा फ्रान्स र पाँचौ स्थानमा इटाली रहेका छन् ।