संखुवासभा । संखुवासभाको मादीमा यहीँ भदौं २१ गते भएको सामुहिक हत्याकाण्डको छानबिनका लागि हत्याका आरोपी लोकबहादुर कार्कीका भाईलाई पनि प्रहरीले पक्राउ गरेको छ ।
अनुसन्धानमा क्रममा सोधपुछका लागि लोकबहादुरका भाई नरेशलाई प्रहरीले पक्राउ गरेको प्रदेश १ प्रहरी प्रमुख अरुण विसीले जानकारी दिए ।
पक्राउ परेको नरेश माथि इलाका प्रहरी कार्यालय चैनपुरले सोधपुछ गरिरहेको उनले बर्ताए । सामुहिक हत्याकाण्डमा ज्यान गुमाएका १ जनाको मोवाइल लोकबहादुरको घरबाट बरामद भएपनि नरेशले मोवाईल लुकाएको हुनसक्ने र हत्याको समयमा घटनास्थल आसपासमै नरेश पनी भएको हुनसक्ने अनुमान गरि उनलाई पक्राउ गरिएको प्रहरीले जनाएको छ ।
घटनामा ८४ वर्षीय पार्वती कार्की, ५२ वर्षीय तेजबहादुर कार्की, ५२ वर्षीया कमला कार्की, तेजबहादुरकी बुहारी ३२ वर्षीया रञ्जना कार्की, नाती ११ वर्षीय दिपेन र नातिनी ७ वर्षीया गोमाको शव भेटिएको थियो ।
अनुसन्धानका क्रममा छिमेकी लोकबहादुरले आफूलाई हेला गर्ने गरेका कारण चिर्पट प्रहार गरेर तेजबहादुरको हत्या गरेको खुलेको थियो । घटनाको थप अनुसन्धान भइरहेको छ ।
