साँकेतिक तस्बिर
काठमाण्डौं । त्रिभुवन अन्तर्राष्ट्रिय विमानस्थलबाट करिब २ करोड २४ लाख ९२ हजार ३९७ रुपैयाँ बराबरको ३ किलो ३६० ग्राम सुनका गहना सहित २ जनालाई प्रहरीले पक्राउ गरेको छ ।
पक्राउ पर्नेहरुमा कैलाली बर्दगोरिया गाउँपालिका १ घर भएका ३० वर्षीय बोध राज भण्डारी र धनुषा जनकपुर उपमहानगरपालिका २ घर भएका ४७ वर्षीय मुरारीराज अधिकारी रहेका छन् ।
आन्तरिक उडान तर्फको व्यागेज एरियाबाट श्री एयरलाइन्सको उडानद्वारा बिराटनगर जान लागेका उनीहरुलाई उक्त व्यागेज एरियामा खटिएको प्रहरीले एक्सरे मेशिनमा जाँच गर्ने क्रममा भण्डारीको साथबाट २२ क्यारेटको ५१५ ग्राम बराबरको सुनका गहना र अधिकारीको साथबाट २४ क्यारेटको ५ ९७ ग्राम, २२ क्यारेटको १ किलो ५५२ ग्राम तथा पत्थर जडित १४ क्यारेटको ६९६ ग्राम सुनका विभिन्न गहना आवश्यक प्रकृया पूरा नगरी लैजान लागेको अवस्थामा प्रहरीले उनीहरुलाई पक्राउ गरेको हो ।
उनीहरुलाई बरामद सुन सहित आवश्यक कारवाहीका लागि राजश्व अनुसन्धान विभाग हरिहरभवन पुलचोक ललितपुर पठाइएको अन्तर्राष्ट्रिय विमानस्थल सुरक्षा कार्यालय गौचरले जनाएको छ ।