बिरगञ्ज । सुख्खा बन्दरगाह बिरगञ्जमा पहिलोपटक निजी कम्पनीको रेल आइपुगेको छ ।
नेपाल–भारत रेल सेवा सुरुआतको १७ वर्षपछि पहिलोपटक भारतबाट निजी क्षेत्रको कार्गो रेल बुधबार नेपाल आइपुगेको हो । रेलले ९० वटा कन्टेनर बोकेर भारतबाट नेपाल आएको हो ।
२०६१ सालमा स्थापना भएको नेपाल–भारत रेल सेवा सम्झौताअनुसार भारतीय सरकारी स्वामित्वको रेलले मात्रै नेपाललमा सेवा दिंदै आएको थियो ।
भारतको हिन्द टर्मिनल निजी कम्पनीले कन्टेनर बोकेर बिहान १०ः०० बजेट विरगञ्ज सुख्खा बन्दरगाह आइपुगेको थियो ।
सन् २०२१ को जुलाईमा नेपाल र भारत सरकारबीच भएको पारवहन सम्झौताअनुसार भारतीय निजी रेल कम्पनीले नेपालमा ढुवानी सुरु गरेको हो । सम्झौता भएको करिब २ महिनापछि निजी कम्पनीले सञ्चालन गरेको रेल नेपालमा सामान लिएर आइपुगेको बताइएको छ ।
भारत सरकारसँगको सम्झौतापछि निजी क्षेत्रले नेपालमा सामान ढुवानी गर्न बाटो खुल्ला भएको छ । योसँगै, भारत सरकारको विगत १७ वर्षदेखिको एकाधिकार तोडिनुको छ भने निजी कम्पनीबीच प्रतिस्पर्धा हुने देखिएको छ ।
अब नेपाली आयात र निर्यातकर्ताले सहजै वैदेशिक व्यापार गर्न सक्ने उद्योग, वाणिज्य तथा आपूर्ति मन्त्रालयले जनाएको छ ।