साँकेतिक तस्बिर
बैतडी । गुडिरहेको यात्रुबहाक बस माथि ढुंगा खस्दा १ जनाको घटनास्थलमै मृत्यु भएको छ ।
जयपृथ्वी राजमार्ग अन्तरगत पर्ने जिल्लाको पाटन नगरपालिका ८ स्थित झौलेक नजिक गएराति करिब २ः३० बजेको समयमा बस माथि ढुंगा खसेको प्रहरीले जनाएको छ ।
कञ्चनपुरबाट बझाङतर्फ जाँदै गरेको सुपप्र ०२००१ ख ११५६ नम्बरको बसमा माथिबाट खसेको ढुंगाले लागेर बझाङको थलारा गाउँपालिका ५ घर भएका १८ वर्षीय अर्जुन नेपालीको घटनास्थलमै ज्यान गएको जिल्ला प्रहरी कार्यालय बैतडीका प्रवक्ता प्रहरी निरीक्षक दर्शन खड्काले जानकारी दिए ।
ढुंगाले लागेर अन्य ३ यात्रु घाइते भएका छन् । घाइते हुनेहरुमा जयपृथ्वी नगरपालिका ११ का ४० वर्षीय हरिप्रसाद जोशी‚ ३६ वर्षीय नवराज खड्का र कैलालीको धनगढी उपमहानगरपालिका ४ का २८ वर्षीय माधव भट्ट रहेको प्रहरीले जनाएको छ ।
