काठमाण्डौं । नोबल कोरोना भाइरस (कोभिड–१९)बाट आज थप १ हजार १४६ जनामा संक्रमण पुष्टि भएको छ ।
देशैभरको विभिन्न प्रयोगशालामा गरिएको १० हजार ९१६ नमूना परीक्षणमा शुक्रबार १ हजार १४६ जनामा संक्रमण देखिएको स्वास्थ्य तथा जनसंख्या मन्त्रालयले जनाएको छ ।
आज संक्रमण देखिएका मध्ये ८ हजार ५४९ जनाको पीसीआर गर्दा ९६१ जना र २ हजार ३६७ जनाको एन्टिजेन परीक्षण गर्दा १८५ जनामा संक्रमण देखिएको छ ।
आज संक्रमण देखिएका सहित नेपालमा संक्रमितहरुको कुल संख्या पीसीआर तर्फ ७ लाख ७५ हजार ५४८ जना र एन्टिजेन तर्फ ८६ हजार ४०४ जना पुगेका छन् ।
शुक्रबार नै १ हजार ६६० जनाले कोरोना जित्न सफल भएका छन् । यो सहित कोरोना जित्नेको संख्या ७ लाख ३६ हजार ६६६ जना पुगेको मन्त्रालयले जनाएको छ ।
पछिल्लो २४ घण्टामा संक्रमणका कारण थप २१ जनाको ज्यान गएको छ । यो सहित संक्रमणबाट ज्यान गुमाउनेको संख्या १० हजार ९२४ जना पुगेको छ ।