काठमाण्डौं । काठमाडौं महानगरपालिका ४ बिशालनगर डेरा गरी बस्ने गुल्मी रेसुङ्गा नगरपालिका १० घर भएकी ४७ वर्षीया बदुनी कुवँरको कोठाबाट नगद १ लाख रुपैयाँ तथा सुनका विभिन्न गरगहना समेत गरी अन्दाजी १४ लाख ९५ हजार रुपैयाँ चोरी भएको घटनामा संलग्न रहेको अभियोगमा २ जनालाई प्रहरीले पक्राउ गरेको छ ।
पक्राउ पर्नेहरुमा काठमाण्डौं महानगरपालिका ३२ कोटेश्वर घर भएकी २३ वर्षीया ईडेन लामा न्यौपाने र ललितपुर हात्तिवन बस्ने महोत्तरी जलेश्वर नगरपालिका २ घर भएका २२ वर्षीय रितिक चौधरी रहेका छन् ।
महानगरिय बृत्त मालिगाउँले दिएको जानकारी अनुसार कुवँरको कोठामा चोरी भएको भन्ने खबर प्राप्त हुनासाथ खटिएको प्रहरी टोलीले उनले काम गर्न राखेकी ईडेनलाई नियन्त्रणमा लिईएको थियो ।
अनुसन्धान गर्ने क्रममा ईडेनले उक्त धनमाल चोरी गरी निजकै साथी रितिकलाई राख्न दिएको भन्ने खुल्न आएपछि ललितपुर सातदोवाटो चोकबाट चोरीका गरगहना सहित रितिकलाई प्रहरीले पक्राउ गरेको जनाएको छ ।
घटनाको बिषयमा प्रहरीले थप अनुसन्धान गरिरहेको जनाएको छ ।